Юксалиш умуммиллий ҳаракати раиси ва Олий Мажлис депутати Бобур Бекмуродов йўлларга ўрнатилган кузатув камералари ва жарималар юзасидан ўз мурожаатини эълон қилди. Депутат камералардаги камчиликлар ва «ноинсоф» тадбиркорлардан арз қилган.

Шу кунларда тадбиркорлик субъектлари томонидан ўрнатилган йўл қоидабузарликларини қайд этувчи камералардаги камчиликлар ҳамда ноинсоф тадбиркорлик фаолияти ҳақидаги гумонлар жамоатчиликни ташвишлантирмоқда, — деб ёзмоқда Бобур Бекмуродов.

Бобур Бекмуродов хато ва камчиликларни санаб ўтиш билан бир қаторда, уларга ечимларни ҳам таклиф қилиб, ИИВ Йўл ҳаракати хавфсизлиги хизматини тезкорлик билан қуйидаги чораларни кўришга чақирган:

• мазкур тадбиркорлик фаолияти билан шуғулланаётган барча субъектларнинг сўнгги ҳафталардаги қайдномаларини тафтиш қилиш ва ҳуқуқий баҳо бериш чораларини кўриш;
• тафтиш натижасида ноинсоф тадбиркорлик йўли билан ундирилган жарималар аниқланган тақдирда, уларни бекор қилиш ва ҳайдовчиларга тўловларни тадбиркорлар ҳисобидан қайтариш;
• тадбиркорлик субъектларининг назорат-камералари орқали қайд қилинаётган жарималарни назорат тартибида доимий текшириш амалиётини жорий қилиш;
• фуқароларнинг адолатсиз жарималар устидан шикоят қилишдаги оворагарчиликдан асраш мақсадида, қайдномаларга онлайн шикоят бериш имкониятини яратиш;
• барча локациялардаги радар ўрнатилганлиги тўғрисидаги белгилар ёнида чекланган тезликни акс эттирувчи белгиларни ўрнатишни мажбурий қилиш.

Шунингдек, у бу борадаги фаолият юзасидан жамоатчиликка мунтазам равишда ахборот бериб бориш амалиётини йўлга қўйиш мақсадга мувофиқ деб ҳисобланишини қайд этган.

Бундан ташқари, депутат фуқароларга ҳам мурожаатини йўллаб, бир қатор мажбуриятларини эслатиб ўтган.

Ўз ўрнида, пиёдалар ва йўл ҳаракати иштирокчиларининг хавфсизлигини таъминлаш мақсадида, фуқароларимизни йўл ҳаракати қоидаларига қатъий амал қилишларини сўраймиз, — деб ёзмоқда Бобур Бекмуродов.

«Ўзбекистон — инсон қадри улуғланадиган, ҳуқуқий ва ижтимоий давлатдир», — деб фикрини тамомлайди Юксалиш ҳаракати раиси.

Президент Шавкат Мирзиёев имзолаган қарор асосида, 2021 йил 1 мартдан бошлаб, тадбиркорлик субъектларига автомобил йўлларида йўл ҳаракати қоидалари бузилганини қайд этиб борувчи махсус автоматлаштирилган фото ва видео дастурий-техник воситалари (камералар) ўрнатилишини ташкил этиш ҳуқуқи берилган эди.

2022 йилда эса, Пойтахт кўчаларига янги турдаги видеокузатув камералари ўрнатилгани хабар берилган. Айтилишича, янги турдаги камералар йўлларда автомобил ҳаракатини тартибга солиш ва қоидабузарликларни рўйхатга олиши мумкин. Видеокузатув камералар 24 соат тинимсиз ишлаши, инспекторлар жараённи кузатиб боришлари ҳам айтилган.

Ички ишлар вазирлигининг Йўл ҳаракати хавфсизлиги бош бошқармаси Тошкент шаҳри бўйича мавжуд онлайн режимида ишловчи фоторадарлар ва интеллектуал режимида ишловчи камералар тўғрисида маълумот ҳам берган.

Юксалиш ҳаракати аввалроқ ҳуқуқ-тартибот ўрганларига ҳам ўз мурожаатларини эълон қилган ва унда Ўзбекистон ҳуқуқий ва дунёвий давлат эканини эслатиб ўтган.