Ўзбекистоннинг Кореядаги элчихонаси матбуот хизматининг хабар беришича, 2022 йил 29 октябр куни Хеллоуил байрами нишонланган Сеулнинг Итевон кўчасида тиқилинч рўй бериб, нафас қисилиши ва юрак тўхташи оқибатида 156 киши вафот этган, 196 нафари эса жароҳатланган.

Ушбу воқеада бир нафар Ўзбекистон фуқароси ҳам ҳаётдан эрта кўз юмган.

Ўзбекистоннинг Кореадаги элчихонаси мазкур давлатда бўлиб турган ўзбекистонликларга шу кунларда одамлар гавжум тадбирлар, турли хилдаги митинг ва намойишларда қатнашмасликни тавсия қилган.

Шунингдек, фуқаролар иштирокида фавқулотда вазиятлар рўй берган ҳолларда элчихонанинг қуйидаги масъул ходимларига зудлик билан қўнғироқ қилишини хабар берган:

1. Консул Элёр Нишонов – 010-6802-1969
2. Вице-консул Азамат Болтаев – 010-2909-4334
3. Атташе Абдуманнон Исанов – 010-3213-4505.

Эслатиб ўтамиз, аввалроқ, Жанубий Кореяда Хеллоуил байрамини нишонлаш учун тўпланган одамларнинг 50 га яқини оёқ остида қолиш ва нафас етишмаслиги оқибатида вафот этгани хабар қилинганди. Улар орасида камида 19 нафари чет эл фуқароси, жумладан, ўзбекистонликлар ҳам борлиги айтилган.