Mastercard Ўзбекистондаги биринчи расмий ваколатхонаси очилишини эълон қилди. Бу ҳақда 2023 йил 16 май Самарқандда бўлиб ўтган ЕТТБ йиллик конференцияси давомида маълум қилинди, деб хабар бермоқда Bugun.uz мухбири Анора Бозорова.

Mastercard — тўловларни қайта ишлаш соҳасида дунёдаги энг йирик корпорация бўлиб, бутун дунё бўйлаб ўз тармоқларини кенгайтирмоқда.

Расмий ваколатхонани очиш бизга жойлардаги эҳтиёжни яхшироқ тушуниш имконини беради ва биз энг замонавий рақамли технологик ечимларни таклиф этиб, янада ғайрат билан ишлаймиз. Эндиликда, барчанинг манфаати учун, яқин йилларда рақамли иқтисодиёт тараққиёти бўйича умумий мақсадларга эришиш йўлида, биз янада фаол ва унумли ишлашимизга аминман, — деди EEMEA (Шарқий Европа, Яқин Шарқ, Африка) минтақасида Mastercard президенти Димитриос Досис.

Конференция доирасида Mastercard инклюзив тараққиёт маркази ўта муҳим глобал шерик — Европа Тикланиш ва Тараққиёт Банки билан Марказий Осиёда келгусида ҳамкорликни кенгайтириш ва кичик бизнес эгалари, айниқса аёллар учун рақамли имкониятларни кенгайтириш мақсадида ўзаро англашув меморандумини имзолади. Ушбу меморандум Ўзбекистон ва Қозоғистонда микро ҳамда кичик корхоналар рақамли имкониятларини кенгайтириш учун Марказий Осиёдаги келгусидаги ҳамкорликни ўрганишга қаратилган.

Ўтган йилда Mastercard ва Ўзбекистон Марказий банки ўртасида уч йиллик рақамли технологиялар соҳасида шериклик тўғрисида келишув ва Рақамли технологиялар вазирлиги билан кичик ва ўрта корхоналарни рақамлаштириш, финтех, киберхавфсизлик, туризм, ақлли шаҳар, молиявий саводхонлик, шунингдек молиянинг ҳаммабоплиги каби асосий йўналишлар бўйича англашув меморандуми имзоланган эди.

Бу йил Рақамли технологиялар соҳасидаги шериклик тўғрисидаги келишувга мувофиқ Mastercard Марказий банк билан биргаликда мамлакатда рақамли тўловлар ўтишини янада жадаллаштиришга қаратилган тўлов экотизимини ривожлантириш бўйича 8 компонентли лойиҳани муваффақиятли якунлади.