Шайх Нуриддин Холиқназаров 18 октябр куни Қоҳира шаҳрида бошланган ислом оламида катта аҳамиятга эга бўлган анжуманда ҳозирги кундаги муҳим масалаларни илгари сурган. Бу ҳақда муфтий ўзининг Telegram-каналида хабар берган.

Халқаро конференцияда шайх ахборот асрида турли ёт ғоялар хуружи ислом оламини ташвишга солаётгани, турли ихтилофлар юзага келаётгани ва шу каби муаммоларга ечим топишда фатво идораларининг ўрни, мусулмон аҳлининг ҳамжиҳатлигига эришишда фатвонинг аҳамияти алоҳида эканлигини таъкидлаган.

Шунингдек, муфтий бу каби муаммолар юзага келиши етарли илм ва малакага эга бўлмаган шахсларнинг фатво бериши оқибатида келиб чиқаётганини қўшимча қилган.

Муфтий бу каби муаммоларга ечим топишда ислом дини илм-маърифатга асосланган дин эканлигини тарғиб қилиш, уламолар ҳамкорлигини мустаҳкамлаш ва одамларнинг эҳтиёжини таъминлаш кабилар эканлигини айтиб ўтган.

Шайх Нуриддин Холиқназаров сўнгги йилларда Ўзбекистонда ёт ғояларга қарши самарали ишлар олиб борилаётгани ва Марказий Осиёдаги ягона Фатво маркази самарали ишлаётганини ҳам қўшимча қилган.