Мустақилликнинг 32 йиллиги муносабати билан «Янги Ўзбекистоннинг янги кинолари» ойлиги бўлиб ўтмоқда
Кинокарвон тадбирлари 15 августдан 15 сентябргача давом этади.
Ўзбекистон Республикаси Мустақиллигининг 32 йиллиги муносабати билан Ўзбекистон бўйлаб 15 августдан 15 сентябрга қадар «Янги Ўзбекистоннинг янги кинолари» ойлиги ўтказилмоқда.
Сирдарё вилоятидан бошланган Кинокарвон сафари Жиззах ва Самарқанд вилоятларида ҳам бўлиб ўтди. Кинокарвоннинг илк манзили бўлган Сирдарё вилоятининг Янгиер ва Ширин шаҳарларида таниқли киноижодкорлар Ўзбекистонда хизмат кўрсатган артист Гулчеҳра Саъдуллаева, актёрлар Шавкат Комилов, Отабек Ҳақбердиев, Муқаддас Саъдуллаева, Саид Мухторов, Умид Шодмоновлар билан учрашув ташкил этилди. Халқ билан учрашувдан сўнг киноижодкорлар Янгиер шаҳридаги Мурувват уйига ҳам ташриф буюриб, беморлар ҳолидан хабар олишди.
Шу билан бирга, кинокарвон тадбирлари доирасида «Бардош» ва «Судя» бадиий фильмлари намойиш этилди.
«Янги Ўзбекистоннинг янги кинолари» шиори остида ўтказилаётган тадбирлар республика бўйлаб давом этиши режалаштирилган. Киноойлик давомида 50 дан ортиқ бадиий, анимацион ва ҳужжатли филмларнинг намойишлари ўтказилади. Бундан ташқари давлат телеканалларида ҳам миллий филмларнинг телевизион намойиши бўлиб ўтади.
