Қўқондаги бозорда содир бўлган йирик ёнғин бўйича жиноят иши қўзғатилди
Bugun.uz манбасининг хабар қилишича, ёнғин оқибатида бир нафар аёл куйиш тан жароҳати олиб, шифохонага ётқизилган
Фарғона вилояти Қўқон шаҳрида жойлашган «Буюк Ипак йўли» бозорида йирик ёнғин содир бўлди. Уни ўчиришга 10 та ёнғин-қутқарув экипажи жалб қилиган. Ҳолат юзасидан ФВВ маълумот берди.
Таъкидланишича, 12 июн куни соат 19:17 да Фарғона вилояти Қўқон шаҳар Байналминал кўчасида жойлашган «Буюк Ипак йўли» савдо комплекси ҳудудидаги дўкон расталарида содир бўлаётгани тўғрисида ФВБга хабар тушган.
Шунга асосан 10 та ёнғин-қутқарув экипажи соат 19:25 да воқеа жойига етиб борган. Ёнғин-қутқарув бўлинмалари томонидан кўрилган тезкор ҳаракатлар натижасида ёнғин бўлаётган ҳудуд соат 20:25 да қуршаб олинган.
Соат 23:12 да вазирлик ёнғинни ўчириш жараёни акс этган лавҳаларни эълон қилди. Соат 23:30 га келиб, ёнғин тўлиқ ўчирилгани хабар қилинди.
Bugun.uz манбасининг хабар қилишича, ёнғин натижасида бир нафар аёл куйиш тан жароҳати олиб, шифохонага ётқизилган.
Ҳозирда ёнғиннинг келиб чиқиш сабаби ва моддий зарар миқдорини аниқлаш ишлари олиб борилмоқда.
Бош прокуратура матбуот котиби Хаёт Шамсутдиновнинг хабар қилишича, Қўқондаги савдо комплексларида содир бўлган ёнғин бўйича Жиноят кодексининг 259-моддаси (Ёнғин хавфсизлиги қоидаларини бузиш) билан жиноят иши қўзғатилган. Фарғона вилояти ИИБ ҳузуридаги Тергов бошқармаси томонидан тергов ҳаракатлари олиб борилмоқда.
