Бу йилги ош чемпионатида иштирок этиш учун 2200 дан ортик ошпазлар республиканинг барча вилоятларидан, ҳамда Қозоғистондан 12 та, Қирғизистондан 3 та, Тожикистондан 9 та, Россиянинг Қозон шаҳридан 1 та ариза келиб тушган. Ушбу чемпионатда касби, ёши, миллати, иш жойидан қатъий назар ҳар бир йигит иштирок этиши мумкин.

Ош чемпионати нима учун узоқ танаффусда қолди?

Бунга сабаб чемпионат ташкилотчилари томонидан ўша вақтда энг кучли ошпазларнинг кашф қилиниши ва янги ошпазларни саралаш учун яна бир авлод ўсиб етилиши керак эди. Янги чемпионатда ўйин шартлари ўзгармайди, асосий шартлар аввалгидек, фақат, охирги финалда эълон қилинган шарт ошпазлар ошнинг турига қараб чойхона палов билан тўй ошини дамлайди.

Ўйинда бир неча бор қатнашиш мумкинми?

Чемпионатга қабул қилинган, аммо ютқазган ошпазлар бу йилги ўйинда иштирок эта олмайди, аммо кейинги йилги чемпионатда иштирок этишлари мумкин. Ҳар бир ошпаз бир йилда бир марта иштирок эта олади.

Ҳозирги кунга келиб, 2200 кишидан ариза тушган. Саралаш босқичида эса ариза берган ошпазларнинг иш жойига махсус комиссия бориб кўриб, хулоса берганидан кейин қабул қилинади.

Саралаш босқичи 16 та ўйиндан иборат. Чемпионатга қабул қилинган 32 та ошпаздан 16 таси ним чорак босқичга йўлланма олади. Қуръа ташлаш йўли билан ним чорак босқичидаги ошпазлар ким билан жангга киришишлари аниқланади.

• ним чорак босқичи 8 та ўйиндан иборат: 16/8;
• чорак финал ўйинлари: 8/4;
• ярим финал ўйинлари: 4/2;
• финал: 2/1.

Чемпионатга ким ҳакамлик қилади?

Бу чемпионат ташкилотчилари томонидан сир тутилади. Чемпионатнинг Бош ҳаками: Ўзбекистонда хизмат кўрсатган коммунал ва маиший савдо ходими Ўткир Даминов.

Экспертлар таркиби анча кенгайтирилган, бироқ чемпионат қоидасига кўра, кимлар экспертлик қилиши ўйин бошлангунига қадар маълум қилинмайди.