Ўзбекистон Озарбайжон халқаро туризм ярмаркасида илк бор «ҳамкор давлат» сифатида иштирок этмоқда. Бу ҳақда унда иштирок этаётган Bugun.uz мухбири хабар берди.

Ўзбекистон делегациясининг иштироки Маданият ва туризм вазирлиги ҳамда Milliy PR-markazi ДУК, шунингдек, Ўзбекистоннинг Озарбайжондаги элчихонаси ҳамкорлигида, Uzbekistan Airways кўмагида ташкил этилмоқда.

Сайёҳлик кўргазмасининг очилишида Ўзбекистон ҳукумати номидан мамлакатнинг Озарбайжондаги фавқулодда ва мухтор элчиси Баҳром Aшрафхонов ҳамда Milliy PR-markazi директори Дилфуза Самандарова сўзга чиқди.

Ўзбекистон Президентининг 2023 йил 29 март куни бўлиб ўтган селектор йиғилишида қабул қилинган қарорига кўра, Озарбайжон ва Туркия Ўзбекистонда туризм хизматлари экспортини кўпайтириш ва ушбу мамлакатлардан сайёҳларни жалб қилиш мақсадида Хоразм вилоятига бириктирилди.

Ушбу топшириқнинг ижросини таъминлаш мақсадида, кўргазма доирасида Хоразмдан катта делегация иштирок этмоқда, унинг таркиби 7 та сайёҳлик компанияси, Ичан қалъа раҳбарияти, маданият ва санъат намояндалари, мусиқачилар ҳамда ҳунармандлардан иборат.

AITF—2023 доирасида давлат сайёҳлик ташкилотлари, маркетинг компаниялари, шунингдек, Ўзбекистон делегацияси вакилларининг Озарбайжон туроператорлари билан майдончаларни фаол сотиш бўйича ишбилармонлик учрашувлари ҳамда 2023 йилнинг ноябр ойида Тошкент шаҳрида бўлиб ўтадиган ТХТЙ—2023 Тошкент халқаро туризм ярмаркасида иштирок этиш шартлари билан танишиш режалаштирилган.