«Ўзбекистон Конституцияси тўғрисида»ги қонун лойиҳаси матни эълон қилинди
Умумхалқ референдуми 30 апрел куни ўтказилиши режалаштирилган
«Ўзбекистон Республикаси Конституцияси тўғрисида»ги Ўзбекистон Республикаси Конституциявий Қонуни лойиҳаси матни эълон қилинди. Қонун лойиҳаси 6 бўлим, 155 моддадан иборат. Конституциявий қонун референдуми якунлари Марказий сайлов комиссияси томонидан расмий эълон қилинган кундан кучга киради.
Конституциявий қонун кучга киргунига қадар Ўзбекистон ҳудудида амалда бўлган қонунлар ва бошқа норматив-ҳуқуқий ҳужжатлар ушбу Конституциявий қонун таҳриридаги Конституциясига зид бўлмаган қисмида қўлланилади. Конституциявий қонун таҳриридаги Ўзбекистон Республикаси Конституцияси нормалари тегишли қонунлар ва бошқа норматив-ҳуқуқий ҳужжатлар қабул қилинишидан ёки мавжудлигидан қатъи назар, Конституциявий қонун кучга кирган пайтдан эътиборан тўғридан-тўғри амал қилади.
Аввалроқ Олий Мажлис Сенати 14 март куни бўлиб ўтган мажлисда янги таҳрирдаги Конституция тўғрисидаги қонун лойиҳаси бўйича референдум ўтказиш тўғрисидаги қарорни маъқуллаганди. Овоз берган 83 сенатордан 80 нафари қарорни қўллаб-қувватлаганди, 1 нафар сенатор қонунга қарши овоз берган, 2 нафар сенатор эса бетараф қолган. 30 апрел куни ўтказилиши режалаштирилган умумхалқ референдуми овоз бериш бюллетенида «Сиз «Ўзбекистон Республикасининг Конституцияси тўғрисида»ги Ўзбекистон Республикаси Конституциявий қонунини қабул қиласизми?» деган савол бўлади.
