Ўзбекистон Канаданинг Arton Capital компанияси таҳлилчилари томонидан тузилган дунё давлатларининг 2023 йилги меҳмондўстлик рейтингида (Welcoming Countries Rank-2023) 26-ўринни эгаллади.

Қайд этилишича, мутахассислар уни тузишда маълум бир давлат қанча мамлакат фуқароларини визасиз ёки келгандан кейин бериладиган виза билан қабул қилишини ҳисоблаб чиққан.

Ўзбекистон мазкур рейтингда 26-ўринни эгаллаган: 139 давлат фуқаролари визасиз ёки етиб келганидан кейин бериладиган виза билан қабул қилинади.

Бу кўрсаткич бўйича Тожикистон 49-ўринни (87 давлат), Қирғизистон 53-ўринни (80 та давлат), Қозоғистон 54-ўринни (77 давлат), Россия 62-ўринни (63 мамлакат) банд этган.

Биринчи ўринни 20 дан ортиқ мамлакатлар эгаллаган, жумладан, Тувалу, Жанубий Судан, Сомали, Боливия, Ангола, Малдив ороллари, Кот-д’Ивуар, Камбожа, Нигерия ва бошқалар. Уларнинг ҳар бирига 198 давлат фуқаролари визаси кириши ёки етиб келганида виза олиш орқали кириши мумкин.

Анъанага кўра, рейтингнинг сўнгги поғонасини Шимолий Корея, Туркманистон ва Афғонистон эгаллаган. Бу мамлакатларнинг барчаси 0 баллга эга.

Аввалроқ Ўзбекистон паспортининг жаҳон рейтингидаги ўрни маълум бўлганди. Мамлакат фуқаролари 25 та давлатга визасиз ташриф буюриши мумкин, шунингдек, 44 та давлатга келгандан сўнг виза расмийлаштириш керак бўлади. Бундан ташқари, Ўзбекистон мобил интернет нархи бўйича жаҳон рейтингида кўтарилгани тўғрисида хабар берилганди.