Ўзбекистон 2023 йилнинг биринчи чорагида газ, кўмир, нефт ва нефт маҳсулотлари импортини кескин оширди. Бу ҳақда Президент ҳузуридаги Статистика агентлиги хабар берди.

Маълумотларга кўра, уч ой ичида 152,9 миллион долларлик газ импорт қилинган, бироқ етказиб беришнинг деярли барчаси март ойига тўғри келади — 151,2 миллион доллар. Бу 2022 йилнинг январ–март ойларига нисбатан 2,6 баробар кўп, шунингдек, ушбу хом ашёнинг 2022 йилдаги импортининг ярмидан бир оз кўпроқ (281,9 миллион доллар).

Шу билан бирга, газ экспорти январда — 3,7 миллион долларни, февралда — 3,7 миллион долларни, март ойида эса 20,4 миллион долларни ташкил этди.

Ўзбекистон январ–март ойларида 45,2 миллион долларлик (январда — 13,2 миллион доллар, февралда — 16 миллион доллар, мартда — 16 миллион доллар) кўмир импорт қилди, бу 2022 йилнинг биринчи чорагига нисбатан 61,7 фоизга кўпдир.

Нефт ва нефт маҳсулотларини етказиб бериш ҳажми 43,3 фоизга ошиб, 510 миллион долларни ташкил этди (январда — 135,1 миллион доллар, февралда — 152,5 миллион доллар, мартда — 222,4 миллион доллар).

Статистика агентлиги электр энергияси импорти ва экспорти бўйича январ ойидаги  маълумотларни эълон қилмаган. Феврал–март ойларида электр энергияси импорти 34,4 миллион долларни ва экспорт эса 18,9 миллион долларни ташкил этган.

Аввалроқ Ўзбекистон ва Россия газ соҳасида ҳамкорлик бўйича «йўл харитаси»ни имзолаганди. Кейинчалик Энергетика вазирлиги «Газпром» билан имзоланган шартнома шартларини очиқлаб, Ўзбекистоннинг мавжуд газ транспорти тизимига эгалик ҳуқуқини тўлиқ сақлаган ҳолда ички бозорга табиий газ зарур миқдорларда етказиб бериш мақсад қилинганганини маълум қилганди.