Ўзбекистонда дам олиш кунлари кузатиладиган об-ҳаво маълумоти эълон қилинди
Мамлакатда 8–9 апрел кунлари ҳарорат 27 даражагача илиқ бўлади
Республика Гидрометеорология маркази Ўзбекистон бўйича 8–9 апрел, дам олиш кунлари кузатиладиган об-ҳаво маълумотини эълон қилди.
Унга кўра, 8 апрел куни кечаси ва эрталаб Қорақалпоғистон Республикаси ва Хоразм вилоятида, куннинг иккинчи ярмида Тошкент, Самарқанд, Жиззах, Сирдарё вилоятларининг баъзи жойларида қисқа муддатли ёмғир ёғиши, момақалдироқ бўлиши мумкин. Қолган ҳудудларда ёғингарчилик кутилмайди.
9 апрел, якшанба куни эса фақат Қорақалпоғистон Республикаси, Хоразм, Бухоро, Навоий вилоятларида ёмғир ёғади.
Дам олиш кунлари ҳарорат кечалари 7–12 даража илиқ, кундуз кунлари 22-27 даража илиқни ташкил этади.
Шунингдек, Тошкент шаҳрида шанба куни куннинг иккинчи ярмида қисқа муддатли ёмғир ёғиши, момақалдироқ бўлиши мумкин. Якшанба куни ёғингарчилик кутилмайди. Ҳарорат кечаси 8-10 даража илиқ, кундузи 22-25 даража илиқ бўлади.
