Шавкат Мирзиёевнинг Ўзбекистон маҳалла тизими ходимлари ва фаолларига йўллаган табригида мамлакатда маҳалла назорати ва маҳалла раиси сўрови институтлари жорий этилиши ҳақида маълум қилинган.

Табрикда қайд қилинишича, маҳалланинг ижтимоий-иқтисодий ҳаётдаги ролини ошириш эътибор марказида бўлади. Маҳалла фуқаролар йиғинига ўзи жойлашган ҳудуддаги халқ депутатларининг маҳаллий кенгашлари сессияларига таклифлар киритиш, кенгаш қарори ва лойиҳаларини ишлаб чиқиш, муҳокама қилишда иштирок этиш ҳуқуқи берилмоқда.

Шунингдек, аҳоли ўртасида эътирозларга сабаб бўлаётган ижтимоий муаммоларни аниқлаш ва ҳал этиш учун маҳалла раиси томонидан муҳокамалар ўтказиш, ҳар ойда маҳалла кенгашида тегишли давлат орган ва ташкилот раҳбарлари ахборотларини эшитиш амалиёти йўлга қўйилиб, маҳалла назорати ва маҳалла раиси сўрови институтлари жорий этилади.

Аввалроқ Шавкат Мирзиёев маҳалла тизими ходимлари ва фаолларига табрик йўллагани ҳамда маҳалла тизими ходимлари куни муносабати билан бир гуруҳ ўзбекистонлик мукофотлангани ҳақида хабар берилганди.