Қозоғистонда энергетик ичимликлар савдосига чекловлар қўйилади
Мамлакат Соғлиқни сақлаш вазири 21 ёшгача бўлган шахсларга энергетик ичимликлар сотишни тақиқловчи қонун лойиҳаси муҳокамада эканини маълум қилди.
Қозоғистон Соғлиқни сақлаш вазири Азҳар Гиният Қозоғистонда 21 ёшгача бўлган шахсларга энергетик ичимликлар сотиш тақиқланиши мумкинлигини маълум қилди, деб хабар бермоқда Tengrinews.kz нашри.
Бугун «Халқ саломатлиги тўғрисида»ги қонун лойиҳаси доирасида, парламент депутатлар ташаббуси билан 21 ёшга тўлмаган шахсларга энергетик ичимликлар сотишни тақиқлаш тўғрисидаги қарорни кўриб чиқмоқда», — дейди Азҳар Гиният ҳукумат брифингида.
Унинг таъкидлашича, Соғлиқни сақлаш вазирлиги қарорни қўллаб-қувватлаган.
Қонун лойиҳаси ёшлар ва болаларнинг энергетик ичимликлар истеъмол қилиб, ўз соғлиғига зарар етказаётгани билан изоҳланди. Вазир ҳозирда муҳокама кетаётгани, яқин кунларда лойиҳа Сенатга юборилишини айтган.
Ҳозирда Қозоғистонда энергетик ичимликларни истеъмол қилиш тақиқланмаган, бироқ 18 ёшгача бўлган болалар учун тавсия этилмайди. Божхона иттифоқининг «Озиқ-овқат маҳсулотларининг хавфсизлиги тўғрисида»ги Техник регламенти тоник (энергетик) ичимликлардаги кофеин, тоник моддалар манбалари, шунингдек, тоник таъсирга эга доривор ўсимликлар ва уларнинг экстрактлари учун рухсат этилган максимал стандартларни белгилайди.
