Бугун, 5 ноябр куни Қозоғистонда илк бор 45 нафар туман ва вилоят шаҳарлари ҳокимларини сайлаш учун сайлов жараёни бошланди. Бу ҳақда Kazinform ахборот агентлиги хабар берди.

Унга кўра, туман, вилоят аҳамиятидаги шаҳар ҳокими сайлови тегишли ҳудудий сайлов комиссияси томонидан сайлов ўтказиладиган кундан камида 50 кун олдин масъулат қарори билан белгиланган.

Шунингдек, сайловга қадар уни пилот режимида ўтказиш учун 17 та вилоят масъуллари томонидан 42 та туман ва 3 та вилоят аҳамиятига эга шаҳарлар рўйхати тасдиқланган. Номзодларни рўйхатга олиш сайлов комиссиясига барча зарур ҳужжатлар келиб тушганидан сўнг бошланиб, сайлов кунига 25 кун қолганда маҳаллий вақт билан соат 18:00да якунланган.

Ҳудудий сайлов комиссиялари томонидан туманлар ва вилоят аҳамиятига молик шаҳарлар ҳокимлигига 164 нафар номзод рўйхатга олинган. Улардан 69 нафари сиёсий партиялар томонидан, 95 нафари эса ўзлари томонидан кўрсатилган. Рўйхатга олинган номзодларнинг 20,73 фоизи иқтисодчи, 19,51 фоизи ҳуқуқшунос, 16,46 фоизи ўқитувчи, 12,2 фоизи муҳандис, 11,59 фоизи қишлоқ хўжалиги мутахассислари, 19,51 фоизи бошқа касблар вакилларидир.

Маълумот учун, Қозоғистонда сайловолди ташвиқоти «Сайлов тўғрисида»ги Конституциявий қонун билан тартибга солинади. Бошқа номзодларга нисбатан овоз беришда иштирок этган сайловчиларнинг энг кўп овозини олган номзод сайланган шаҳар ҳокими ҳисобланади. Рўйхатга олинган номзодларнинг ўртача ёши – 46,4 ёшни ташкил этади. Манғистау вилоятининг Бейнеу туманидаги энг ёши катта номзод – 61 ёшда, энг ёши кичик номзод эса Туркистон вилояти Мақтаарал туманида бўлиб, 29 ёшни ташкил қилган. Номзодларнинг аксарияти эркаклардир. Шу билан бирга 10 нафар аёл рўйхатга олинган.

Эслатиб ўтамиз, аввалроқ Қозоғистон Ғазодаги фуқароларини эвакуация қилиши ва Фаластинга 1 млн доллар гуманитар ёрдам бериши ҳақида хабар берилганди.