«Путин ядровий қуролдан фойдаланишга қарор қилгани бўйича ҳеч қанақа белги йўқ» — Оқ уй
Вашингтон ҳозирда Путиннинг Стратегик ҳужум қуроллари тўғрисидаги шартномадан чиқишга оид баёнотини таҳлил қилмоқда
АҚШ Владимир Путин Украинада ёки бошқа жойда ядровий қуролдан фойдаланишга тайёрлиги белгиларини кўрмаяпти. Бу ҳақда АҚШ Хавфсизлик кенаши вакили Жон Кирби «Дождь»га берган интервьюсида малум қилди.
«Биз Россия ядровий қуролланиш соҳасида амалга ошираётган барча ишларни диққат билан кузатмоқдамиз ва ҳозирда шуни айта оламизки, Путин Украина ёки бошқа жойда ядровий қуролни қўллаш бўйича қарор қабул қилгани белгиларини кўрмаяпмиз», — дейди Кирби.
Америкалик амалдорнинг таъкидлашича, Вашингтон ҳозирда Путиннинг Россия бир томонлама тартибда Стратегик ҳужум қуроллари тўғрисидаги шартномаси («СНВ-3»)дан чиқиши ҳақидаги баёнотини таҳлил қилмоқда.
Россия президенти Владимир Путин 21 февраль куни Федерал мажлисга йиллик мурожаатида унинг мамлакати АҚШ билан имзоланган стратегик ҳужум қуролларини қисқартириш бўйича шартномадан чиқишини айтганди. «Агар Қўшма Штатлар ядровий қуролни синовдан ўтказса, биз ҳам буни амалга оширамиз. Ҳеч кимда глобал стратегик вазиятнинг барбод бўлиши мумкинлиги ҳақида қараш бўлмаслиги керак», — дея қўшимча қилди Путин.
Ўз навбатида АҚШ президентининг миллий хавфсизлик бўйича маслаҳатчиси Жейк Салливан Путиннинг Ғарб борасидаги айбловини «бемаънилик» деб атаган. «Ҳеч ким Россияга ҳужум қилмади. Россияга Украина ёки бошқа бирор томондан ҳарбий таҳдид мавжудлиги борасида шунақа бемаъни тасаввур бор», — дейди Салливан.
