Россия октябр ойи ичида Ўзбекистон ва Қозоғистонга газ етказиб беришни бошлайди. Бу ҳақда мамлакат президенти Владимир Путин «Валдай» халқаро муҳокама клубининг ялпи мажлисида айтиб ўтди.

Путин газ транспортациясини амалга ошириш учун барча техник талаблар бажарилганини маълум қилган ҳолда, аввалига экспорт ҳажми 3 миллиард кубометр бўлиши, келажакда эса бу миқдор оширилишини таъкидлаган.

«Техник жиҳатдан бу аллақачон амалга оширилган, тўлиқ етказиб бериш жорий йилнинг октябр ойида бошланади. Ҳозирча кичик ҳажмларда, лекин бу Қозоғистон иқтисодиёти учун ҳам, Ўзбекистон иқтисодиёти учун ҳам жуда муҳим. Ҳар бирига 3 миллиард кубометр етказиб берамиз, кейин эса кўпайтиришимиз мумкин», дейди у.

Россия раҳбари Ўзбекистон ва Қозоғистон томони газ етказиб беришни бошлаш учун қувурлар тизимини тиклаш ишларини амалга оширгани, Россияда ҳам бу борада иш олиб борилганини айтган.

«‘Газпром’ эса Россия Федерацияси ҳудудида ҳам шундай қилиши керак эди, жумладан, техник имкониятларимизнинг бир қисмини қайта конфигурация қилиш лозим эди, чунки Совет даврида газ бир йўналишда таъминланган бўлса, энди уни бошқа йўналишда етказиб бериш зарур. Биз буни амалга оширамиз» дея қўшимча қилган Путин.

Маълумот учун, 2023 йилнинг 16 июн куни Ўзбекистон ҳукумати Санкт-Петербург халқаро иқтисодий форумида «Газпром» билан мамлакатга табиий газ етказиб бериш бўйича шартнома имзолаган эди. Кейинроқ Ўзбекистон Энергетика вазирлиги келишув икки йилга тузилгани, етказиб бериш 1 октябрдан бошланиши режалаштирилгани ҳамда харид ҳажми йилига 2,8 миллиард кубометрга яқин эканини маълум қилди. Етказиб бериш эса «Марказий Осиё – Марказ» газ қувури орқали амалга оширилиши кўзда тутилган. Бунинг учун республика ҳудудида янги газ ўлчаш станцияси қурилиши зарур эди. Бундан ташқари, 22 километр янги газ қувурлари қуриш, 56 километр мавжуд тармоқларни таъмирлаш, 14 хил турдаги газ насос қурилмаларини алмаштириш режалаштирилганди.

Эслатиб ўтамиз, аввалроқ Ўзбекистонга Россиядан газ импорти 1 октябрдан бошланиши, бунинг учун барча инфратузилма тайёр бўлгани маълум қилинганди.