Қозоғистонда сўнгги уч кун ичида беш нафар бола кўп қаватли уйлар деразасидан қулаб тушди, деб хабар бермоқда Tengrinews.

Маълумотларга кўра, 4 август куни Олмаотанинг Олмали туманида олти ёшли қиз иккинчи қават деразасидан қулаб тушди. Оқибатда қизча турли тан жароҳатлари билан касалхонага ётқизилган.

Бундан ташқари, 4 август куни Улитау вилоятининг Сатпаев шаҳрида ҳам олти ёшли бола турар-жой биносининг 4-қаватидан деразадан тушиб кетган. Ҳозирда бола оғир аҳволда шифохонада даволанмоқда.

3 август куни Остона шаҳрининг Сариарқа туманида бир ёшли бола бешинчи қаватдаги хонадон деразасидан қулаб тушган. Шифокорлар уни турли тан жароҳатлари билан касалхонага олиб кетишган.

2 август куни Олмаота шаҳрининг Олатау туманида уч ёшли қизалоқ ўн беш қаватли турар-жой деразасидан қулаб тушди ва вафот этди. Ҳозирда ҳуқуқ-тартибот идоралари ходимлари томонидан суриштирув ишлари бошланди, суриштирув ишлари олиб борилмоқда, шунингдек, фожиа ҳолатлари аниқланмоқда. Суд-тиббий экспертиза тайинланган.

3 август куни Темиртау шаҳрида олти ёшли бола уч қаватли турар-жой деразасидан қулаб тушди. Кейинроқ шифокорлар уни турли тан жароҳатлари билан касалхонага олиб кетишган.