«Российская Газета» россиялик автодилерлар Chevrolet Damas микроавтобусларини параллел равишда импорт қилишни бошлагани ҳақида хабар бермоқда. Нашрга кўра, 2023 йилда ишлаб чиқарилган янги Damas Россияда тахминан 1 миллион рубл атрофида сотилмоқда. Россия бозорида таклиф қилинаётган Damas’лар Ўзбекистон ва Қозоғистонда йиғилган.

Damas автомобиллари General Motors лицензияси асосида ишлаб чиқарилади, GM эса Украинада уруш бошлангач Россия бозорини расман тарк этганди. Кейинроқ UzAuto Motors ҳам ўз маҳсулотларини Россия автомобил бозорига етказиб беришни тўхтатганди.

Хорижий брендлар Россия бозорига автомобилларни расмий етказиб беришни тўхтатиб қўйганидан кейин, россиялик дилерлар асосан Қозоғистон, Ўзбекистон ва бошқа қўшни давлатлардаги автомобилларни параллел импорт қилишни бошлаган.

Маълумот ўрнида, параллел импорт Ўзбекистоннинг савдо балансига ижобий таъсир кўрсатиш билан бир қаторда ғарб мамлакатлари томонидан киритилиши мумкин бўлган санкциялар хавфини ҳам оширади.