Россиянинг Ленинград вилоятида КамАЗ юк автомобили бошқарувидаги ўзбекистонлик эркак бир гуруҳ велосипедчилар ва эскорт машинасини уриб юборди. Бу ҳақда Санкт-Петербург полицияси матбуот хизмати хабар берди.

Қайд этилишича, ҳодиса кеча, 7 сентябр куни маҳаллий вақт билан 10:40 Виборг шаҳридаги «Скандинавия» трассасининг 60-километрида содир бўлган. 31 ёшли ҳайдовчи бир гуруҳ велосипедчиларни кузатиб бораётган ўзидан олдинги эскорт машинасига тўқнашиб кетган. Спортчилар орасида 14-15 ёшли ўсмирлар, шунингдек, уларнинг 69 ёшли мураббийи ҳам бўлган. Тўқнашув оқибатида икки нафар қиз ҳалок бўлган, 7 бола ва мураббий эса тан жароҳати олган.

Барча жабрланганлар тиббиёт муассасаларига етказилган. Санкт-Петербург губернатори Александр Бегловнинг сўзларига кўра, қизлардан бири аллақачон операция қилинган ва у айни пайтда реанимацияда.

КамАЗ ҳайдовчисининг бошқарувни йўқотгани сабаблари номаълум. «Фонтанка» манбасига кўра, ҳайдовчи Россияда қонуний ишлаётган Ўзбекистон фуқароси бўлган. Санкт-Петербург полицияси унинг сўроқ қилингани ва ҳибсга олинганини таъкидлади.

«Зарба шунчалик кучли эдики, двигател учиб кетди. Ҳайдовчининг тезлигини баҳолаш қийин, эҳтимол у чалғиган, ухлаб қолган ёки касал бўлиб қолган. Ҳайдовчи жабрланмади, у машинадан тушди, лекин ҳеч кимга яқинлашмади, менимча, у шокда эди», – дейди воқеа гувоҳларидан бири.

Ҳодисадан сўнг «Скандинавия» шоссесидан Виборг шаҳри томон ҳаракатланиш бутунлай тўсиб қўйилган. Ҳозирда тергов ҳаракатлари давом этаётгани маълум қилинган. Ҳолат юзасидан жиноят иши қўзғатилган.