Самарқанд вилояти Пахтачи туманида уч нафар вояга етмаган бола дарёга чўкиб кетди. Бу ҳақида Бош прокуратура матбуот котиби Ҳаёт Шамсутдинов хабар берди.

Маълум қилинишича, 25 май куни соат 14:00 ларда Пахтачи туманида 3 нафар вояга етмаган бола «Зарафшон» дарёсига чўмилиш мақсадида бориб, эҳтиётсизлик оқибатида чўкиб кетган. ФВБ ҳамда ИИБ ходимлари томонидан олиб борилган қидирув ишлари натижасида бир нафар боланинг мурдаси топилган.

Бундай кўнгилсиз ҳодисаларни олдини олиш мақсадида чўмилиш рухсат этилмаган, таъқиқланган, оқим тезлиги юқори бўлган, чуқур, ўзига нотаниш бўлган сув ҳавзаларида чўмилмаслик қоидаларига қатъий риоя қилишингизни сўраб қоламиз, — дейилади хабарда.

Ҳозирда қолган икки нафар болани қидириб топиш ишлари олиб борилмоқда. Мурдаси топилган марҳумнинг ўлими бўйича суд-тиббиёт экспертизаси тайинланган. Терговга қадар текширув ҳаракатлари давом этмоқда.

Маълумот учун, ҳокимликлар фавқулодда вазиятлар органлари билан ҳамкорликда ҳар йили 1 майдан 15 сентябргача сувда бахтсиз ҳодисалар (одамлар ўлими) тез-тез рўй бериб турадиган жойларни аниқлаши керак. Мазкур ҳудудлар бўйича маҳаллий аҳоли ва дам олувчилар ўртасида тушунтириш ишлари олиб бориш шарти билан қирғоқ бўйлаб чўмилишни тақиқловчи белгилар ўрнатиши шарт.