Самарқандда 16-18 май кунлари ўтказилиши режалаштирилган ЕТТБ Бошқарувчилар кенгашининг «Мувофиқликка сармоя киритиш» мавзусидаги йиғилиши бошланди.

Европа тикланиш ва тараққиёт банки халқаро молия институти ҳисобланади. У 1991 йилда тузилган бўлиб, Ўзбекистон 1992-йил 30-апрелда ЕТТБга аъзо бўлган. Ушбу йиғилиш ташкил этилиши ЕТТБ Бошқарувчилар кенгашининг 2022-йил Марокашда бўлиб ўтган 31-йиллик йиғилишида қарор қабул қилинган эди.                                   

Мазкур тадбирга ҳар томонлама тайёргарлик кўриш доирасида 2022-йил июн ойидан 2023-йил мартигача ЕТТБ ишчи гуруҳининг протокол, логистика ва бошқа йўналишлар бўйича 5 та ташрифи ташкил этилди.

Йиллик учрашув ва бизнес-форум 2000 дан ортиқ юқори мартабали давлат амалдорлари, молиявий ва корпоратив раҳбарлар, фуқаролик жамияти вакиллари ва глобал оммавий ахборот воситаларини бирлаштирадиган динамик тадбирлар ва панел муҳокамаларидан иборат. Тадбир шунингдек, ЕТТБ ўтган йил давомида эришган ютуқларини кўриб чиқиш ва келажак режаларини белгилаш имкониятини беради.

Бизнес-форумнинг асосий мавзуси барқарорликка сармоя киритиш бўлади. Йиғилишнинг марказий тадбирларидан бири «Ўзбекистоннинг инвестицион истиқболлари тўғрисида»ги сессия бўлади. Унда мамлакат иқтисодиётининг ўсиш истиқболлари ва сармоя киритиш имкониятлари муҳокама қилинади.

Шунингдек, тадбирнинг уч кунлик кун тартибидан турли мавзуларда экспертлар иштирокида бир қатор муҳокама панел сессиялари ўрин олган. Сессиялар минтақалар ва алоҳида мамлакатларга қаратилган.