СамДУ филиалида бетон плита қулаши бўйича жиноят иши қўзғатилди
Аввалроқ университет маъмурияти икки нафар биринчи босқич талабаси жароҳатланганини айтган. Бироқ Бош прокуратура жароҳат олганлар 6 нафар экани, улар ҳозирда шифохонага жойлаштирилганини маълум қилди.
Самарқанд давлат университети Каттақўрғон филиалида бетон плитанинг қулаши оқибатида жароҳатланган фуқаролар сони университет маъмурияти хабар берганидек икки киши эмас, 6 нафар бўлган. Шунингдек, ҳолат юзасидан жиноят иши қўзғатилган. Бу ҳақда Бош прокуратура матбуот хизмати рахбари Ҳаёт Шамсутдинов Bugun.uz’ga маълум қилди.
Хабарда айтилишича, жароҳатланган фуқаролар ҳозирда шифохонага жойлаштирилган. Бироқ университет маъмурияти олдинроқ икки нафар талаба жароҳат олганини маълум қилганди.
Эслатиб ўтамиз, кеча, 4 сентябр куни соат 09:28 да Самарқанд давлат университети Каттақўрғон филиали фаоллар зали биносининг томидан саҳна қисмининг ўнг бурчагидаги бир дона плита талаба ва ўқитувчилар бўлмаган жойга тушиб кетган. Оқибатда, аввал айтилганидек икки киши эмас, 6 нафар талаба тан жароҳати олиб, шифохонага ётқизилган. Бош прокуратура ҳолат юзасидан Жиноят кодексининг 258-моддаси (Тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилганини маълум қилди.
