Инвестициялар, саноат ва савдо вазирлиги 2023 йилнинг 3 март куни Тошкентда вазирлик раҳбари Лазиз Қудратов ва ACWA Power компанияси бошқаруви раиси Муҳаммад Абунаян ўртасида музокаралар бўлиб ўтгани ҳақида хабар берди.

Суҳбатда компаниянинг Ўзбекистондаги лойиҳалар портфелини амалга оширишнинг долзарб масалалари ҳамда томонларни қизиқтирган соҳаларда инвестициявий ҳамкорликни янада кенгайтириш истиқболлари муҳокама қилинган.

Қайд этилишича, бугунги кунда компаниянинг Ўзбекистондаги инвестициявий портфели умумий қиймати 4,4 миллиард доллардан ортиқ ва қуввати 4,1 гигаваттдан кўп бўлган 5 та лойиҳадан иборат.

Йиғилишда Сирдарё, Бухоро вилоятлари ва Қорақалпоғистон Республикасида умумий қуввати 2,6 гигаватт бўлган шамол электр станцияларини қуриш бўйича лойиҳаларни амалга оширишнинг долзарб масалалари муҳокама қилинди. Лойиҳаларни режадан олдин ишга тушириш мақсадида олиб борилаётган ишларни жадаллаштириш бўйича амалий чора-тадбирлар комплексини кўришга келишилди.

Шунингдек, томонлар Самарқанд вилоятида 500 мегаватт қувватга эга қуёш электр станцияси ва Тошкент вилоятида 200 мегаваттли қуёш электр станциясини қуриш лойиҳалари бўйича тегишли лойиҳаолди жараёнлар ниҳоясига етгани ва янги шартномалар тузилганини маълум қилди.

Томонлар, шунингдек, кимё саноати, банк, телекоммуникация, соғлиқни сақлаш, фармацевтика ишлаб чиқариш ва қишлоқ хўжалиги соҳаларидаги инвестициявий ҳамкорлик масалалари юзасидан фикр алмашди.

Музокаралар якунлари бўйича томонлар муҳокама қилинган лойиҳа ва ташаббусларни ўз вақтида ва муваффақиятли амалга ошириш доирасида манзилли чора-тадбирлар кўришга келишиб олди.

Эслатиб ўтамиз, олдинроқ Ўзбекистонда 10 та қуёш ва шамол электр станцияларини барпо этиш ишлари бошлангани, Ўзбекистонда қуёш ва шамол электр станцияларини харид қилганлик учун компенсация тўланиши, Навоийда Ўзбекистондаги биринчи шамол электр станциясини қуриш лойиҳасини молиялаштириш бўйича битим имзолангани ҳақида хабар берилганди.