Сентоб UNWTO’нинг туризм қишлоқлари рўйхатига киритилди — Азиз Абдуҳакимов
Сентоб Марказий Осиёда бундай рўйхатга киритилган ягона қишлоққа айланди.
Навоий вилояти Нурота туманидаги Сентоб қишлоғи Бутунжаҳон туризм ташкилотининг туризм қишлоқлари рўйхатига киритилди. Бу ҳақда UNWTO Бош Ассамблеясининг Самарқандда давом этаётган юбилей сессиясида иштирок этаётган Bugun.uz мухбири хабар берди. 
Фото: Canaan travel
Қайд этилишича, Самарқандда давом этаётган UNWTO Бош Ассамблеяси доирасида «Энг яхши туризм қишлоқлари» номинацияси бўйича тақдирлаш маросими ўтказилган.
Унда Навоий вилояти Нурота туманидаги Сентоб қишлоғи ғолиб деб топилган. Шу тариқа, мазкур ҳудуд Марказий Осиёда бундай мақомга эришган биринчи туризм қишлоғига айланди.
Маросимда сўзга чиққан Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов Сентобнинг энг яхши туризм қишлоғи дея эълон қилиниши, давлат раҳбари томонидан соҳа ривожи учун қаратилаётган эътибор натижаси эканини таъкидлаган.
«Ўзбекистон Президентининг туризм сектори ва энг аввало, аҳоли турмуш фаровонлигига бўлган эътибори ва ташаббуслари натижасида бугун юртимиз қишлоқларини бутун дунё тан олмоқда. Навоий вилоятидаги Сентоб қишлоғининг ‘Энг яхши туристик қишлоқ’ номинациясидаги ғолиблиги, шубҳасиз, мана шу ислоҳотлар самарасидир!», – дейди вазир.
Мавзуга доир: Сентоб қишлоғига расман «туризм қишлоғи» мақоми берилди
Маълумот учун, 2023 йилнинг март ойида Сентобга «туризм қишлоғи» мақоми берилганди. Қишлоққа бундай мақом берилиши натижасида 200 га яқин ишсиз аҳоли, асосан хотин-қизлар иш билан таъминланган. Қишлоқда 30 дан ортиқ тадбиркорлик субъекти мавжуд бўлиб, Сентоб қишлоғига мунтазам равишда Англия, Франция, Австрия, Россия ва бошқа давлатлардан хорижий сайёҳлар оқими кузатилди.
Эслатиб ўтамиз, аввалроқ Bugun.uz Сентобга «туризм қишлоғи» мақоми берилиши муносабати билан ундан репортаж тайёрлаган эди.
