Шавкат Мирзиёев 13 октябр куни Қирғизистон президенти Садир Жапаровнинг таклифига биноан Мустақил давлатлар ҳамдўстлиги саммитида иштирок этиш учун амалий ташриф билан Бишкек шаҳрига боради. Бу ҳақда Президент матбуот хизмати хабар берди.

Саммит давомида Мустақил давлатлар ҳамдўстлиги доирасидаги ҳамкорликни янада кенгайтириш, савдо, инвестиция, инновациялар, рақамлаштириш, транспорт, таълим ва маданият каби соҳаларда қўшимча лойиҳаларни амалга ошириш масалалари муҳокама қилинади.

Шунингдек, йиғилиш якунида Мустақил давлатлар ҳамдўстлиги доирасидаги ҳамкорликнинг устувор йўналишларига оид битим ва қарорлар қабул қилиш кўзда тутилган.

Эслатиб ўтамиз, Шавкат Мирзиёев 5-7 октябр кунлари Россия президенти Владимир Путиннинг таклифига биноан ушбу мамлакатга борганди.