Шавкат Мирзиёев Тошкентда янги инфратузилма иншоотларини кўздан кечирди.
Тошкентда электр таъминоти тизимидаги авариявий ҳолатлар 60 фоизга қисқаради.
Бугун, 14 октябрда Шавкат Мирзиёев Тошкент шаҳрида куз-қиш мавсумига тайёргарлик ишлари билан танишди. Бу ҳақда Президент матбуот хизмати хабар берди.
Маълум қилинишича, Шайхонтоҳур туманида 19 километрдан зиёд кабел тортилиб, 2 та трансформатор ўрнатилган «Тракторсоз» подстанцияси келаси ойдан иш бошлайди. Натижада пойтахтда кафолатланган 130 мегаватт қўшимча электр энергияси ҳосил бўлади. Бу эса авариявий ҳолатларнинг эҳтимолини 60 фоизга қисқартиради.
Шунингдек, давлат раҳбари Тошкент шаҳри электр таъминоти тизимидаги қурилиш ва модернизациялаш ишларига оид тақдимотлар билан танишган. Яна бешта подстанция қурилаётгани ва тўрттаси янгиланаётгани, улардан жами 850 мегаватт қўшимча қувват олиниши қайд этилган.
