Шавкат Мирзиёев 26 апрел куни Ўзбекистонда ташриф билан бўлиб турган Италия мудофаа вазири Гвидо Крозеттони қабул қилди, дея хабар берди Президент матбуот хизмати.

Учрашув аввалида Гвидо Крозетто Ўзбекистон етакчисига Италия президенти Сержо Маттарелла ва Вазирлар Кенгаши раиси Жоржи Мелонининг саломи ва энг эзгу тилакларини етказди.

«Икки томонлама ҳамкорликнинг бугунги юксак даражаси мамнуният билан қайд этилди. Конструктив сиёсий мулоқот ривожланиб бормоқда. Кейинги бир неча йилда ўзаро савдо ва инвестициялар ҳажми икки баробарга ошди. Мамлакатимизда Италиянинг етакчи олий таълим муассасалари – Турин политехника ва Пиза университетларининг филиаллари фаолият юритмоқда», дейилади хабарда.

Суҳбатда энергетика, шу жумладан, қайта тикланувчи энергетика, логистика, қишлоқ хўжалиги ва бошқа тармоқларда амалий ҳамкорлик қилиш масалаларига алоҳида эътибор қаратилди.

Давлат раҳбари Ўзбекистон ва Италия мудофаа идоралари ўртасида шериклик муносабатларини йўлга қўйиш муҳимлигини таъкидлади.

Минтақавий барқарорлик ва хавфсизликни таъминлаш, жумладан, Афғонистондаги вазиятни тинч йўл билан тартибга солиш масалалари юзасидан ҳам фикр алмашилди.