Ижтимоий-иқтисодий ислоҳотларнинг бориши билан танишиш мақсадида айни пайтда Қашқадарё вилоятида бўлиб турган Шавкат Мирзиёев Қарши шаҳридаги Олий ҳарбий авиация билим юртига борди. Бу ҳақда Мудофаа вазирлиги хабар берди.

Президент билим юрти ошхонасида офицер ва курсантлар билан бирга тушлик қилиб, улар билан суҳбатлашди. Шунингдек, курсантлар учун яратилган шароитлар билан яқиндан танишди ҳамда жанговар машғулотларни кўздан кечирди.

Маълумот учун, ушбу ҳарбий авиация билим юрти 2019 йилнинг 5 июль куни Президент қарори асосида Жиззах шаҳридан Қаршидаги ҳарбий шаҳарчага кўчирилган эди. Қайд этилишича, давлат раҳбари вилоятга ташриф давомида маҳаллалар ҳаёти, таълим муассасалари ва саноат корхоналари фаолиятини ҳам кўздан кечиради.

Аввалроқ Шавкат Мирзиёев Қашқадарёга жўнаб кетгани ҳақида хабар берилганди.