Швейцария парламенти жамоат жойларида бурқа, ниқоб сингари кийимларни кийиб юришни тақиқловчи қонун лойиҳасини қабул қилди. Бу ҳақда Bloomberg хабар берди.

Қайд этилишича, ушбу қонун кеча, 20 сентябр куни мамлакат парламенти қуйи палатаси томонидан қабул қилинган. Юқори палата эса уни аллақачон тасдиқлаган. Қонунчилик ташаббуси ўнг популист партия – Швейцария Халқ партиясидан чиққан. Марказчилар ва Яшиллар партиялари қаршилигига қарамай, қонун лойиҳаси кўпчиликнинг овози билан қабул қилинган.

Қонун билан, эндиликда жамоат жойлари ва жамоат учун очиқ бўлган биноларда оғиз ва кўзларни ёпиб юриш тақиқланади. Аммо бунда баъзи истиснолар ҳам мавжуд. Қонунни бузиш эса 1 000 Швейцария франки (1 104 АҚШ доллари) миқдоридаги жаримага сабаб бўлади.

Маълумот учун, Белгия, Франция каби Европа мамлакатларида ҳам жамоат жойларида юзни ёпиб юриш бўйича тақиқлар мавжуд.

Эслатиб ўтамиз, аввалроқ Ўзбекистонда ҳам шахсни идентификация қилиб бўлмайдиган даражада юзни ёпиб юришни тақиқлаш тўғрисидаги қонун лойиҳаси кўриб чиқилган эди. Шунингдек, яқинда Миср ҳукумати мамлакатдаги мактабларда ниқоб ўрашни тақиқлади.