MOQ bosim ostida qolgani haqidagi xabarlar yuzasidan rasmiy bayonot berdi

O‘zbekiston Milliy Olimpiya qo‘mitasi bosim ostida qolgani haqidagi ayrim nashrlarning xabari yuzasidan rasmiy bayonot berdi.

O‘zbekiston Milliy Olimpiya qo‘mitasi kuchli bosim ostida qolgani va buning natijasida havaskor va professional boks federatsiyalari birlashtirilgani haqida xabarlar tarqatilgan. Qo‘mita bu xabarlar asossiz va yolg‘on ma'lumot ekanini ta'kidladi.

“Boks mamlakatimiz yoshlari orasidagi eng sevimli va ommaviy sport turlaridan biri. Shuningdek, bokschilarimiz xalqaro maydonlarda yurtimiz bayrog‘ini ko‘klarga ko‘tarib, nafaqat mintaqamizda balki jahonda etakchilardan sanalishadi. Bugungi kunda ham Prezidentimizning e'tibori va davlatimizning qo‘llab-quvvatlashi bilan ushbu sport turi rivoji yangi bosqichga olib chiqilmoqda.

O‘zbekiston Milliy Olimpiya qo‘mitasi hamyurtlarimiz va o‘quvchilarimizdan yuqorida ta'kidlangan yolg‘on xabarlarga e'tibor qilmaslikni, o‘z navbatida ommaviy axborot vositalaridan faqatgina rasmiy, ishonchli va asoslangan ma'lumotlarni tarqatishlarini so‘rab qoladi”, — deyiladi bayonotda.