Сурхондарё вилояти ҳокими сенатор бўлди
Бугун Сенатда бўшаб қолган ўринлар учун сайлов бўлиб ўтди
Олий Мажлис Сенатида Сурхондарё вилоятидан бўшаб қолган ўрин учун сайлов бўлиб ўтди. Унда вилоят ҳокими Улуғбек Қосимов энг кўп овоз тўплаб, Сенат аъзолигига сайланди. Бу ҳақда Марказий сайлов комиссияси хабар қилди.
Бугун, 13 июн куни Сурхондарё вилояти Термиз шаҳридаги Ёшлар маркази биносида халқ депутатлари вилоят, туман ва шаҳар Кенгашларининг қўшма йиғилиши бўлиб ўтди. Унда Марказий сайлов комиссияси Раиси Зайниддин Низамходжаев иштирок этди.
Сайлов яширин овоз бериш йўли билан амалга оширилди. Унинг натижаларига кўра, Сурхондарё вилояти ҳокими Улуғбек Қосимов Олий Мажлис Сенати аъзолигига сайланди.
Маълумот учун, Улуғбек Қосимов 1983 йилда туғилган, маълумоти олий, ҳуқуқшунос. 2005 йилда Самарқанд давлат университетини тамомлаган. 2022 йилнинг декабр ойидан Сурхондарё вилоятининг ҳокими вазифасини бажарувчи бўлиб ишлаб келган. 2023 йил март ойида Шавкат Мирзиёев томонидан ҳоким этиб тайинланган.
