Президент матбуот хизматининг хабар беришича, Мирзиёев бугун, 16 ноябр куни Сурхондарёнинг Сариосиё тумани «Боғистон» маҳалласида бўлиб ўтган «Тўпаланг» сув омбори лойиҳасининг биринчи босқичини ишга тушириш маросимида қатнашиб, сув йўлини очиб берган.

Лойиҳанинг биринчи босқичида сув вилоятнинг Сариосиё, Денов, Шўрчи ва Қумқўрғон туманларига етиб борган. Вилоят аҳолисининг марказлашган ичимлик суви билан таъминланиш даражаси эса 70 фоизга етган.

Бу ҳавзага сув тоғлардаги қор ва муз эришидан йиғилади. Текширувларга кўра, ундаги сувнинг қаттиқлик даражаси тўрт фоиз бўлиб, у фойдали минералларга жуда бойдир.

Шунингдек, лойиҳа доирасида сув омборидан то Термиз шаҳригача 380 километр металл қувурлар тортилади. Унинг 159 километри магистрал, 221 километри шаҳар ва туманларни боғловчи ички тармоқлардир. Ҳозирда 147 километр қувур тортиб бўлиниб, сувни тозалаш, босимни камайтириш ва бешта сув йиғиш иншооти барпо этилган.

Маълумот учун, сув ўз оқими билан тушиши туфайли 8,6 миллион киловатт/соат электр энергияси иқтисод қилинади.

Лойиҳанинг иккинчи босқичида марказлашган ичимлик суви билан таъминланиш даражаси 90 фоизга етказилади. Бундан Сариосиё, Денов, Шўрчи, Қумқўрғон, Жарқўрғон, Бандихон, Қизириқ, Шеробод, Ангор, Музработ, Термиз туманлари ва Термиз шаҳридаги икки миллионга яқин аҳоли бемалол фойдаланади. Лойиҳани эса 2024 йилда ўз ниҳоясига етказиш мўлжалланган.

Эслатиб ўтамиз, Шавкат Мирзиёев Сурхондарёга жўнаб кетганди ва ўз ташрифин Ҳаким ат-Термизий мақбарасини зиёрат қилишдан бошлаганди.