Ижтимоий тармоқларда Сурхондарё вилоятининг Сариосиё туманида содир бўлганлиги айтилаётган йўл-транспорт ҳодисаси юзасидан Сурхондарё вилояти ЙҲХБ ахборот хизмати хабар берди.

Маълум бўлишича, 2024 йил 17 сентябрь куни соат 03:15 ларда «Шабнам» МФЙ ҳудудида 2004 йилда туғилган, ҳайдовчилик гувоҳномасига эга бўлмаган фуқаро Nexia 2 ни Денов-Сариосиё йўналиши бўйлаб бошқариб келиб қарама-қарши бўлакдан ҳаракатланиб келаётган 2005 йилда туғилган, ҳайдовчилик гувоҳномасига эга бўлмаган ҳайдовчи бошқарувидаги ВАЗ-2107 русумли транспорт воситаси билан тўқнашиб ЙТҲ содир этган.

Ҳодиса жойидан олинган дастлабки маълумотларга кўра, ВАЗ-2107 русумли автомобиль салонида бўлган 3 нафар йўловчи (ҳайдовчининг синфдошлари) вафот этиб, иккала автотранспорт воситасидаги қолган йўловчилар тан жароҳати олиб туман Тиббиёт бирлашмасига мурожаат қилган.

Ҳозирда ҳолат юзасидан Сариосиё туман ИИБ Тергов гуруҳи томонидан жиноят иши қўзғатилиб, тергов ҳаракатлари олиб борилмоқда. Ҳаракат иштирокчиларидан ҳайдовчилик ҳуқуқисиз, етарлича малакага эга бўлмай транспорт воситасини бошқармасликларини сўраймиз.