Тест синовлари натижасидан норози бўлган абитуриентлар апелляция аризаларини my.uzbmb.uz сайтида (шахсий кабинети орқали) онлайн тарзда 18 августдан 27 августга қадар беришлари мумкин. Бу ҳақда АОКАда ўтказилган брифингда Билим ва малакаларни баҳолаш агентлиги директори маслаҳатчиси Зоҳид Шакаров маълум қилди.

Давлат олий таълим муассасаларига қабул қилишнинг танлов босқичи эса 27–10 август кунлари ўтказилди. Мазкур муддат давомида абитуриентларга тест синовларида тўплаган баллидан келиб чиқиб, олий таълим муассасаси, таълим йўналиши ва таълим шаклини танлаш имконияти берилди.

Танлов натижаларига кўра, 186 871 нафар абитуриент бакалавриат таълим йўналишларига талабаликка тавсия этилди. Шундан:

• давлат гранти асосида – 41 153 нафар;
• тўлов-контракт асосида –145 718 нафар.

Янги тартибга кўра профессионал таълим муассасаларига танлов олий таълим муассасаларининг танлов натижалари эълон қилингандан сўнг ўтказилади. Шунга кўра олий ва профессионал таълим муассасаларига кириш тест синовларида иштирок этган абитуриентлар 2024 йил 18 августдан 27 августга қадар 10 кун давомида my.uzbmb.uz сайтида профессионал таълим муассасаси (коллеж ёки техникум), касб ва мутахассислик ҳамда таълим шаклини танлашлари лозим.

Абитуриентлар танлаш муддати якунлангунга қадар ўз танловларини ўзгартиришлари мумкин.

Абитуриентларнинг талабаликка тавсия этилган ёки этилмагани тўғрисидаги якуний танлов натижалари танлаш тўлиқ якунлангандан сўнг бир ҳафта муддатда эълон қилинади.

апелляция аризасини берган абитуриентга уни кўриб чиқиш санаси ва вақти кўрсатилган хабарнома берилади.

Абитуриент хабарномада белгиланган вақтда шахсини тасдиқловчи ҳужжат ва хабарнома билан Билимни баҳолаш агентлигига келиши керак.