14:38 | 22.09.23

                       

Тошкент метрополитени маъмурияти йўловчиларни огоҳлантирди

15 кун ичида 3 нафар йўловчи ўзбошимчалик билан поезд йўлига тушган.

«Тошкент метрополитени» ДУК метрополитен йўловчиларини огоҳлантирди. Бу ҳақда корхона матбуот хизмати хабар берди.

Фото: Bugun.uz

Маълум қилинишича, сўнгги пайтларда метродан фойдаланувчи йўловчилар сони кескин ортиши билан йўловчилар томонидан бир қанча тартиббузарлик ҳолатлари содир этилмоқда. Жумладан, охирги 15 кун ичида 3 маротаба йўловчилар поезд йўлига ўзбошимчалик билан тушган ва бекатда фаолият олиб борувчи ходимлар томонидан улар хавфсиз тарзда платформага олиб чиқилган. Йўловчилар бунга сабаб сифатида турли шахсий буюмлари поезд йўлига тушиб кетганини келтирган.

Маълумот учун, метро йўлларида инсон ҳаёти учун хавфли ва ҳатто унинг ўлимига олиб келадиган даражада юқори кучланишли (825 волт) электр токи мавжуд. Ваҳоланки 42 волт кучланишдаги ток инсон ҳаёти учун хавфли ҳисобланади.

«Шу сабабли метродан фойдаланиш вақтида ҳушёр ва сергак бўлинг. Агарда бу каби ҳолатларга дуч келсангиз зудлик билан бекат платформасида фаолият олиб борувчи ходимларга мурожаат қилишингиз лозимлиги эслатиб ўтамиз», дейилади хабарда.

Эслатиб ўтамиз, аввалроқ «Пахтакор» метро бекатида 26 ёшли киши ўзини поезд остига ташлашга уринганди. Шунингдек, Тошкент метросида сумкасида бомба борлигини айтган қиз беш суткага қамалганди.

Мавзуга доир хабарлар билан танишинг: