Бош прокуратура Тошкент вилояти Пискент туманидаги «Тошкент» давлат ўрмон хўжалигига қарашли «Ангрен ўрмон бўлими» 1-участкасида содир бўлган ёнғин юзасидан жиноят иши қўзғатган.

Эслатиб ўтамиз, «Лоло ариқ» маҳалласида жойлашган «Тошкент» ўрмон хўжалигига 1 июл куни соат 12:00 да ёнғин юз берган. Вилоят ФВБ ва туман ФВБ бўлими ходимлари махсус ўт ўчириш машиналари ва ўрмончилар билан биргаликда уни тўлиқ бартараф этган.

Ҳудудда ёввойи қуриган ўтлар ва табиий ҳолда ўсган жинғил буталари ёнган. Зарарланган майдон 5,89 гектарни ташкил этган. Ҳозирда соҳа мутахассислари томонидан ўсимлик дунёсига етказилган зарар ҳисобланмоқда.

Ҳолат юзасидан Тошкент табиатни муҳофаза қилиш прокуратураси томонидан Жиноят кодексининг 198-моддаси (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва 207-моддаси (Мансабга совуққонлик билан қараш) билан жиноят иши кўзғатилган. Бош прокуратура томонидан мазкур жиноят иши тергови устидан назорат ўрнатилган.