Тошкент шаҳрида 1 ноябрдан бошлаб жамоат транспортида йўл ҳақи нархлари оширилади. Бу ҳақда «Тошшаҳартрансхизмат» АЖ матбуот хизмати хабар берди.

Қайд этилишича, эндиликда Президентнинг 2023 йил 16 февралдаги «Жамоат транспорти тизимини ислоҳ қилиш чора-тадбирлари тўғрисида»ги қарорига асосан, 1 ноябрдан бошлаб бир йўловчи учун нақд пул ва банк карталар орқали тўлов қилинганда йўл ҳақи нархи 2000 сўм этиб белгиланди. АТТО транспорт карталари орқали тўланганда эса йўлкира қиймати 1700 сўм бўлади.

Шунингдек, бунда рағбатлантирувчи тарифлар бўйича АТТО транспорт карталаридан фойдаланган ҳолда бир соат ичида иккинчи маротаба автобусдан фойдаланилса, йўл ҳақи учун 700 сўм кам тўланади. Бир соат давомида йўловчиларнинг автобус орқали учинчи ва тўртинчи маротаба маълум бир манзилга ҳаракатланиши эса мутлақо бепул бўлади.