19:14 | 18.07.23
Тошкентда бир гуруҳ аёллар ва эркаклар ўртасида жанжал бўлди — видео
Тармоқларда тарқалган видеоларда аёллар эркакларга «хизмат» кўрсатиши, шу ерда яшайдиганлар эса булардан безор бўлгани айтилганди.
Тошкент шаҳар ИИББ ижтимоий тармоқларда тарқалган пойтахтнинг Чилонзор туманидаги «Шуҳрат» чоррахасидаги бир гуруҳ аёллар кўчада тортишиб, жанжаллашгани акс этган видео бўйича маълумот берди.
Қайд этилишича, 18 июлга ўтар кечаси тахминан соат 00:40 ларда Чилонзор ва Учтепа туманлари ҳудудида жойлашган Заргарлик кўчасида бир нечта фуқаролар ўзаро жанжаллашган. Воқеа жойига етиб келган ИИО ходимлари фуқароларни тинчлантириб, ҳуқуқбузар шахсларни ИИБга олиб борган. Жанжал оқибатида бир нафар фуқаро пешонасининг юмшоқ тўқималари лат ейиши жароҳати билан тиббий ёрдамга мурожаат қилган, сўнг уйига кетган.
Мазкур ҳолат юзасидан терговга қадар текширув тайинланган, унинг якуни бўйича айбдор шахслар аниқланиб, уларга нисбатан қонуний қарор қабул қилиниши таъминланади, — дейилади хабарда.
Тошкент шаҳар ИИББ қўшимча қилишича, шу куни тахминан соат 00:30 ларда шу ҳудудда Nexia ва Сobalt автомобиллари тўқнашган, содир бўлган ЙТҲни кўриш учун эса одамлар тўпланган. Тўқнашув оқибатида жароҳатланганлар қайд қилинмаган.
