Тошкент шаҳрида қизлари билан бирга Суриядаги террорчилик ташкилоти сафига қўшилган аёл қидирувга берилди. Бу ҳақда пойтахт Ички ишлар бош бошқармаси матбуот хизмати хабар берди.

Аниқланишича, 2015 йилда 42 ёшли М.Л. Москва шаҳрида яшовчи Д. билан «Одноклассники» ижтимоий тармоғида танишиб қолган. Эркак уни Россияга боришга ундаган. М.Л. «Жиҳодчилар» террорчилик ташкилоти аъзоси Д. нинг даъвати билан аввал Озарбайжонга, ундан эса Туркия орқали Сурияга борган. Аёл ва унинг 1998 ва 2000 йилларда туғилган икки қизи Сурияда «Ҳайят таҳрир аш-шам» жангарилари сафига бориб қўшилган.

Ҳозирда уларга нисбатан Жиноят кодексининг 244-2-моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда қатнашиш) билан жиноят иши қўзғатилиб, қидирув эълон қилинган.

Эслатиб ўтамиз, аввалроқ Сурияда террорчилик ташкилотига раҳбарлик қилган ўзбекистонлик эркак ҳалок бўлганди. Яна бир Ўзбекистон фуқароси эса Жанубий Кореяда халқаро террорчилик ташкилотини молиялаштиргани аниқланган. Шунингдек, Тошкентда террорчилик ташкилотининг бир гуруҳ яширин аъзолари қўлга олинган.