Тошкентда машина ичидан 27 ёшли эркакнинг мурдаси топилди
Марҳумнинг мурдаси Бунёдкор кўчасидаги автотураргоҳда, бош қисмига полиэтилен пакет ўралган ҳолда аниқланган.
Тошкент шаҳрининг Чилонзор туманида машинадан 27 ёшли эркакнинг мурдаси топилган. Бу ҳақда Бош прокуратура матбуот хизмати Bugun.uzʼга хабар қилди.
Аниқланишича, 31 август куни соат тахминан 18:00 ларда 1996 йилда туғилган эркак Б.A. яшаш манзилидан ўз бошқарувидаги қора рангли Gentra автомашинасида чиқиб кетиб, бедарак йўқолган.
Ўтказилган тезкор-қидирув тадбирлари давомида эркак мурдаси Чилонзор тумани, Бунёдкор кўчасидаги футбол спорт майдони ҳудудида жойлашган автотураргоҳдан топилган. Хабарда мурданинг бош юз қисми бир неча қатлам полиэтилен пакет билан ўралган ҳолда топилгани айтилган.
Мазкур ҳолатда эркакнинг мурдаси шубҳали ҳолда аниқлангани ва бир қатор дастлабки тергов ҳаракатлари ўтказилмасдан туриб қонуний тўхтамга келиш имкони мавжуд эмаслигини инобатга олиб, Жиноят кодексининг 97-моддаси 1-қисми (Қасддан одам ўлдириш) билан жиноят иши қўзғатилди. Тергов ҳаракатлари олиб борилмоқда.
