Тожикистонда кеча, 27 август куни кузатилган кучли жаладан сўнг сел келиши оқибатида 13 киши ҳалок бўлди. Бу ҳақда «Sputnik Тожикистон» хабар берди.

Қайд этилишича, кучли ёмғир натижасида мамлакатнинг бир қатор вилоятларида кўчки ва сел ҳодисалари кузатилган. Жумладан, Душанбе, Ваҳдат, Рудакий, Варзоб, Деваштич, Рашт, Сангвор ва Тожикобод шаҳарлари табиий офатдан зарар кўрган. Кучли сел Ваҳдат туманида 11 киши, Рудакийда 2 кишининг ҳаётига зомин бўлган.

Тожикистон президенти Эмомали Раҳмон ҳалок бўлганларнинг оила аъзолари ва ҳодисадан жабрланганларга ҳамдардлик билдирди. Давлат раҳбари, шунингдек, бош вазир, Фавқулодда вазиятлар ва фуқаролик мудофааси қўмитаси ҳамда бошқа тегишли тузилма ва мутасадди ташкилотларга табиий офатдан жабрланганларнинг оила аъзоларига ёрдам кўрсатиш, фалокат оқибатларини бартараф этиш юзасидан зудлик билан чора-тадбирлар кўриш бўйича топшириқлар берган.

27 август куни ёққан кучли ёмғир Душанбе-Хўжанд йўлининг айрим қисмларига ҳам жиддий зарар етказган. Магистрал бўйлаб ҳаракатланиш вақтинчалик тўхтатилган. Айни пайтга келиб, йўлда тозалаш ишлари давом этаётгани маълум қилинган.

Эслатиб ўтамиз, аввалроқ 27 август куни Ўзбекистон ҳудудида ҳам об-ҳаво кескин ўзгариши ҳақида хабар берган эдик.