2023 йил 23 октябр куни Тошкент шаҳрида катта тирбандлик юзага келган. Мазкур ҳолатга Транспорт вазирлиги расмий муносабат билдирди.

Қайд этилишича, 23 октябр куни пойтахтнинг бир нечта асосий кўчаларида қурилиш таъмирлаш ишлари олиб борилганлиги сабабли транспорт воситалари ҳаракати чекланиб, бошқа кўчалардаги мавжуд оқимга юклама бўлган.

Натижада шаҳардаги ҳаракат тезлиги, йиғилиб қолган оқим ҳисобига кескин тушиб кетган. Мазкур ҳолат эса барча кўчаларда транспорт воситалари ҳаракат тезлигини пасайишига олиб келган.

Шунингдек, айни шу жиҳат Тошкент шаҳридаги жамоат транспорти автобусларининг ҳаракатига салбий таъсир кўрсатган.

Хусусан, Алишер Навоий, Лабзак, Сағбон, Сақичмон, Меҳржон, Кичик ҳалқа йўли, 8 март, Шота Руставели, Бобур, Ойбек, Арнасой, Истиқбол, Муқимий-Нукус ҳамда Нурафшон айланма кўчалари орқали ҳаракатланувчи 70 дан ортиқ автобус йўналишларида куннинг тиғиз пайтида қатнов вақти ҳамда оралиқ интервал вақтларига риоя этиш имкони бўлмагани айтилган.

Эслатиб ўтамиз, аввалроқ, Тошкент метросида тирбандликни пасайтириш мақсадида Олий таълим вазирлиги 19 та олийгоҳда дарс бошланиш вақтини соат 09:30 га кўчиришга қарор қилгани хабар қилинганди.