Туркия жанубида юз берган зилзилалар оқибатида ҳалок бўлганлар сони 44 370 кишига етди. Бу ҳақда мамлакат Фавқулодда вазиятлар оқибатларини бартараф этиш бошқармаси (AFAD) бошлиғи Юнус Сезарга таяниб, Anadolu хабар берди.

Унинг сўзларига кўра, вайрон бўлган 21 мингта бино ҳудудида қидирув-қутқарув ишлари якунланган. «Ҳозирда бор диққат-эътиборимизни вайроналарни тозалашга қаратганмиз», — дейди Сезар.

Бошқарма бошлиғининг қўшимча қилишича, айни вақтда табиий офат оқибатларини бартараф этишга 230 мингдан ортиқ давлат хизматчилари жалб этилган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилганди. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади. Бундан ташқари, Ўз навбатида Жаҳон соғлиқни сақлаш ташкилоти Туркиядаги кучли зилзиладан омон қолганлар очиқ ҳавода ва «даҳшатли шароитда» қолган бўлиб, бу ер ости силкинишлари оқибатида ҳалок бўлганлар сонига тенг яна шунча қурбонларни юзага келтириши мумкинлигини маълум қилганди.