Ўзбекистон инвестициялар, саноат ва савдо вазири Лазиз Қудратов Mareven Food Holdings (Ветнам) компанияси директори Нгуен Дуонг билан видео-конференция музокарасида тез тайёрланадиган озиқ-овқат маҳсулотлари, алкоголсиз ичимликлар, қуритилган сабзавотлар ва чипс ишлаб чиқарадиган 125 миллион долларлик йирик завод қуриш муҳокама қилинди. Лойиҳа Тошкент вилоятидаги «Ангрен» эркин иқтисодий зонаси ҳудудида амалга оширилиб, 800 та янги иш ўрни яратилади.

Музокара давомида ветнамлик ҳамкорлар компания маҳсулотларини қабул қилиш, Ўзбекистон ҳамда Марказий Осиё мамлакатлари бозорларига тарқатиш мақсадида Тошкент вилоятида логистика маркази фаолиятини ташкил этиш бўйича олиб борилаётган ишларнинг ҳолати ҳақида ҳам сўзлаб берди. Ўзбекистон томони компаниянинг мамлакатдаги сармоявий ташаббусларини амалга оширишда ёрдам беришга тайёрлигини билдирди.

Учрашув якунлари бўйича лойиҳаларни амалга ошириш юзасидан ҳамкорлик қилиш тартиби келишиб олинган.

Аввалроқ Uzum холдинги мамлакат иқтисодиётини рақамлаштириш учун хорижий инвестицияларни жалб қилишни режалаштираётгани, Ўзбекистон—Озарбойжон инвестиция жамғармаси ташкил этилгани ҳақида хабар берилганди.