Ижтимоий тармоқларда Yandex Go такси хизматининг солиқлардан бўйин товлагани сабаб шу йилнинг сентябр ойидан бошлаб Ўзбекистондаги фаолиятини тўхтатиши мумкинлиги, унинг ўрнини бозорда Эстониянинг BOLT ва Украинанинг UKLON компаниялари кириб келиши ҳақида хабарлар тарқалди.

Бундан ташқари, журналист Алишер Рўзиохунов Twitter’да Yandex мамлакат бозоридан чиқиб кетишига тадбиркор Алишер Усмонов фойдасига ишлашини маълум қилган. Унга кўра, Усмонов компанияси бозорда ягона бренд остида иш бошлайди.

Bugun.uz сўровига кўра, компаниянинг Ўзбекистондаги расмий вакиллари ушбу маълумотни рад этди.

Ушбу маълумотлар ҳақиқатга тўғри келмайди. Хизматлар одатдагидек ишламоқда, Ўзбекистон биз учун муҳим бозор. Биз хизматни ривожлантиришда давом этамиз. Шунингдек, мамлакатда янги шаҳарлар, технологиялар ва ҳайрия лойиҳаларини ишга туширишни режалаштирмоқдамиз, — дейилади хабарда.

Маълумот учун, Yandex Go Ўзбекистонда 2018 йилнинг апрел ойида ишга туширилган. Компаниянинг ўз ҳайдовчилари ва машиналари йўқ, хизмат маҳаллий ташувчилар билан ҳамкорликда ташкил қилинган. Бугунги кунда такси хизмати Тошкент, Фарғона, Бухоро, Марғилон, Наманган, Андижон ва Самарқандда фаолияти йўлга қўйилган.