Самарқанд шаҳрида Ўзбекистон-Франция бизнес-форуми бўлиб ўтгани ҳақида хабар берилганди. Форум доирасида Соғлиқни сақлаш вазири Амрилло Иноятов ва Фармацевтика тармоғини ривожлантириш агентлиги директори Абдулла Азизов Франциянинг Airbus Helicopters компанияси раиси билан музокара олиб борган.

Соғлиқни сақлаш вазирлиги матбуот хизмати музокаралар натижасига кўра, Франциядан 10 та тиббиёт вертолёт сотиб олиш бўйича келишувга эришилгани ҳақида хабар берди. Унга кўра, Ўзбекистон шунча миқдордаги Airbus H-145 русумли тиббий вертолёт сотиб олади ва мамлакатда Европа стандартларидаги тиббий авиация хизмати ташкил этилади. Шунингдек, музокара давомида бу соҳанинг моддий-техника базасини яратиш ҳамда мутахассислар тайёрлаш, тоғли ва чекка ҳудудларда тиббий авиация хизматини ташкил этиш механизмларини ишлаб чиқиш истиқболлари муҳокама қилинган.

Шунингдек, Франциянинг биологик ва онкологик препаратлар ишлаб чиқарувчи компанияси вакиллари билан ҳам музокара ўтказилган. Унда респиратор, юрак-қон томир ва онкологик хасталиклар, ОИВ, тромбоэмболиялар, цереброваскуляр касаллик, қандли диабет, гепатит ҳамда паркинсонни даволашга мўлжалланган дори воситаларини ишлаб чиқарувчи мазкур компания раҳбарияти билан маҳаллийлаштириш имкониятларини чуқур ўрганишга келишиб олинган.

Форум доирасидаги навбатдаги мулоқотда вазир тиббий кислород генераторлари, тиббий газ қурилмалари ва тизимларини ишлаб чиқариш билан шуғулланувчи «Газ систем» компанияси раиси Жан Эдуард билан ўзаро ҳамкорлик масалаларини кўриб чиққан.