Аввалроқ тан олинмаган Тоғли Қорабоғ Републикасида янги президент сайлангани ҳақида хабар берган эдик. Ўзбекистон Ташқи ишлар вазирлиги баёнот билан чиқиб, мамлакат Қорабоғда ўтказилган сайловнинг натижасини тан олмаслигини маълум қилди.

Баёнотда Ўзбекистон Озарбайжоннинг суверенитети ва ҳудудий яхлитлигини ҳурмат қилиши ва Қорабоғда 2023 йилнинг 9 сентябрида ўтказилган «қўштирноқ ичидаги» президентлик сайловларини тан олмаслиги таъкидланган.

«Ўзбекистон Республикаси дўст Озарбайжон Республикасининг суверенитети ва ҳудудий яхлитлигини қатъий қўллаб-қувватлайди, унинг ички ишларига ҳар қандай аралашувни қоралайди ва 2023 йил 9 сентябрь куни Қорабоғда ўтказилган қўштирноқ ичидаги президент сайловларини тан олмайди», дейилади ТИВ баёнотида.

Эслатиб ўтамиз, 2022 йилнинг март ойида собиқ ташқи ишлар вазири Абдулазиз Комилов Сенатдаги чиқишида Ўзбекистон Украинадаги Донецк ва Луганск Халқ Республикаларини тан олмаслигини маълум қилганди. Шундан сўнг вазир даволанаётгани боис узоқ вақт кўриниш бермаган. 2023 йилнинг апрел ойида эса у лавозимидан озод қилинган. Кейинроқ Комилов Президентнинг ташқи сиёсат масалалари бўйича махсус вакили этиб тайинланган.