Президент Шавкат Мирзиёев ва Қатар Амири Шайх Тамим бин Ҳамад Ол Соний биргаликда давлат ташрифи якунида ўзаро ҳамкорликни янада мустаҳкамлашга қаратилган бир нечта ҳужжатларни имзолади. Бу ҳақда Президент матбуот хизмати хабар берди.

Жумладан, музокаралар якунида ҳамкорликнинг турли соҳаларини қамраб олувчи қуйидаги ҳужжатлар имзоланди:

1. Ўзбекистон ва Қатар ҳукуматлари ўртасида туризм ва ишбилармонлик тадбирлари соҳасида ҳамкорлик тўғрисидаги битим;
2. Ўзбекистон Президенти ҳузуридаги Миллий ижтимоий ҳимоя агентлиги ва Қатар Ижтимоий ривожланиш ва оила вазирлиги ўртасидаги ҳамкорлик меморандуми;
3. Ўзбекистон ва Қатар Ички ишлар вазирликлари ўртасида ўзаро англашув меморандуми;
4. Ўзбекистон Тикланиш ва тараққиёт жамғармаси ва Қатар Инвестиция агентлиги ўртасида инвестициявий ҳамкорлик тўғрисидаги ўзаро англашув меморандуми;
5. Ўзбекистон Коррупцияга қарши кураш агентлиги ва Қатар Маъмурий назорат ва шаффофлик бошқармаси ўртасида ўзаро англашув меморандуми.

Бундан ташқари, ташриф давомида қуйидаги келишувлар тузилди:

1. Ўзбекистон Дин ишлари бўйича қўмитаси ва Доҳа халқаро динлараро мулоқот маркази ўртасида ўзаро англашув меморандуми;
2. Инсон ҳуқуқлари бўйича Ўзбекистон Миллий маркази ва Қатарнинг Инсон ҳуқуқлари бўйича Миллий қўмитаси ўртасида ўзаро англашув меморандуми;
3. Ўзбекистон ва Қатар Савдо-саноат палаталари ўртасида қўшма ишбилармонлар кенгашини ташкил этиш тўғрисидаги битим;
4. Савдо-саноат палаталари ўртасида ўзаро англашув меморандуми.

Эслатиб ўтамиз, Шавкат Мирзиёев 1 октябр куни Қатарга ташрифи давомида Al Mirqab Capital холдинг компанияси ижрочи директори Саиф ур-Раҳмон билан учрашиб, меҳмонхона инфратузилмаси ва туризм хизматларини ривожлантириш, логистика ва энергетика тармоғини модернизация қилиш борасидаги ҳамкорлик истиқболларини муҳокама қилганди.