2023 йил 25 октябр куни Ўзбекистон ҳукумати делегацияси Бишкек шаҳрига ташрифи мобайнида «Ал-Арча» қароргоҳида Беларус бош вазири Роман Галовченко билан икки томонлама учрашув ўтказгани ҳақида Вазирлар маҳкамаси матбуот хизмати хабар берди.

Учрашувда Ўзбекистон томони икки томонлама ҳамкорлик бўйича ҳукуматлараро комиссиянинг ўнинчи йиғилишини ва иккинчи минтақалараро форумини йил охиригача Тошкентда ўтказиш таклиф қилган.

Шунингдек, ўзаро товар айирбошлаш кўрсаткичлари ўсаётгани ва ўтган йилда унинг хажми 42 фоизга юқорилагани айтилган.

Ушбу музокаралар давомида ҳукуматлар зиммасига яқин йилларда товар айирбошлаш ҳажмини бир миллиард долларга етказиш вазифаси қўйилган.

Учрашувда савдо-сотиқ ва корхоналар ўртасида саноат кооперациясини кенгайтириш, қишлоқ хўжалиги ва маданий-гуманитар соҳалардаги ҳамкорликни ривожлантиришга қаратилган вазифалар ижросини таъминлаш бўйича биргаликдаги сай-ҳаракатлар юзасидан ўзаро фикр алмашилган.

Эслатиб, ўтамиз, аввалроқ, бош вазир Абдулла Арипов 25-26 октябр кунлари Қирғизистонда бўлиши хабар қилинганди.